आओ म्हारो गांव देखो
निरालो निम्बाज देखो
गांव री गलियां में थांने
आज मैं घुमाउं देखो
निम्बाज री महीमा उंची
जिला री है शान देखो
गांव मांही घुसां जणे
कुबाजी रो थान देखो
मीठा मीठा लोग अठे
मीठी मीठी वाणी देखो
गंगाजल सो पावन अठे
मीठो मीठो पाणी देखो
चैराया रे माथे अठे
आसरलाई गेट देखो
बाजारां रे मांही अठै
मोटा मोटा सेठ देखो
गाडा माथे घूमे अठे
विदेशी सैलानी देखो
कैमरो में कैद कर वे
ले जावे निशानी देखो
एतिहासिक मन्दिर अठे
मगरमण्डी थान देखो
बाबा रा देवरा अठे तो
बायासा रा थान देखो
संतां री तो धरती आ तो
मोटो रामद्वारो देखो
अेकर अठे दरसण कर
जीवन तो संवारो देखो
गांव रे तो जोड़े अठे
मोटो ध्यान केन्द्र देखो
मोटा मोटा संत अठे
करे जय जिनेन्द्र देखो
आओ म्हारो गांव देखो
निरालो निम्बाज देखो
गांव री गलियां में थांने
आज मैं घुमाउं देखो
‘पथिक’
