दादीजी की स्मृति में

चन्द लाईनें मेरी स्वर्गीय दादीजी श्रीमती सुन्दर देवी
को श्रद्धांजली स्वरूप समर्पित
आज मैं बताऊं थांने
केड़ी म्हारी धा व्हेती
तावड़ा में तपियोड़ा ने
निम्बड़ा री छींया व्हेती
वा तो माँ जेड़ी माँ व्हेती
एड़ी म्हारी धा व्हेती

रोवता कदेई मैं तो
थपकी दे सुलाय देती
नीन्द नहीं आवती तो
हालरियो हुलराय देती
चिड़ी औेर कागला री
कांणिया सुणाय देती
वा तो माँ जेड़ी माँ व्हेती
एड़ी म्हारी धा व्हेती

मिन्दरां जाती तो धा
म्हाने भी बुलाय लेती
पूजा करती धा म्हाने
टोकरियो पकड़ाय देती
छोटा छोटा हाथां मांही
मकाणा जिलाय देती
वा तो माँ जेड़ी माँ व्हेती
एड़ी म्हारी धा व्हेती

बाल पणे धा म्हाने
लाड घणे लडावती
रोटी मैं नी खावता
भूखी वा रे जावती
म्हाने नीन्द आया बिना
वो खुद सो नी पावती
वा तो माँ जेड़ी माँ व्हेती
एड़ी म्हारी धा व्हेती

आज म्हारी धा री म्हने
याद घणी आवे है
चेहरो सामी आवतां ही
आंखियां भर जावे है
धा म्हारी व्हेती म्हने
गोदियां सुलावती
वा तो माँ जेड़ी माँ व्हेती
एड़ी म्हारी धा व्हेती